<
Поиск в новостях
   
Главное меню

О школе

Музей

Нормативные документы

Колонка психолога

Спортивный отдел

ГТО

Профилактика правонарушений

Антикоррупционная политика

Методические материалы!

Почта

Календарь новостей
« 2017 г. »
« декабрь »
Пн Вт Ср Чт Пт Сб Вс
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Друзья сайта

ОФП учащихся
ОФП учащихся 5-11 кл

Статистика

Сана Дьыл 2018
21 декабря 2017

Д.П. Коркин аатынан оскуолабытыгар барыта 446 үөрэнээччи респбликабыт 23 улууһуттан, 2 куоратыттан үөрэх уонна спорт эйгэтин тэҥҥэ тутан сайдар. Бу оскуола сүрүн уратыта – оҕо айылҕаттан бэриллибит дьоҕурун сөптөөх хайысхатын таба тайанан сайыннарар сыал турар.
Саҥа Дьыл, оҕо аймахха күүтүүлээх бырааһынньыга, Чурапчы улууһугар бастакынан Д. П. Коркин аатынан спортивнай интэринээт-оскуолаҕа ахсынньы 21 күнүгэр буолла.
Оскуола иһинэн быйыл күүстээх быыбары баран, хас да куолаһынан куоһаран тахсыбыт оскуолабыт биир тарбахха баттанар спортсмена Ленский Андриан “Эдэр коркинецтар” оҕо тэрилтэтин президенэ буолбута. Бу эппиэтинэстээх дуоһунаска, салайар үлэҕэ, бастакы хардыыны оҥорон, оскуолабыт директорын Н.Н. Гуляевтыын тэҥҥэ тахсан Саҥа Дьыл үөрүүлээх аһыллыытыгар оҕолорго, учууталларга, ыраахтан айаннаан кэлбит төрөппүттэргэ эҕэрдэ тылын эттэ.
Быйылгы 2017 сылга спортсмен оҕолорбут Россия түһүлгэтигэр тиийэ саха оҕото кыаҕын көрдөрдүлэр. Ол тэтимин ыһыктыбакка үөрэнээччилэри үөрүүлээх быһыыга-майгыга бэлиэтиир үтүө үгэс Саҥа Дьыл бырааһынньыгар буолла. Хас биирдии отделениеттан “Сыл бастыҥ спортсмена” тута конвертан ааҕыллан биллэрилиннэ. Бастакынан “Сыл бастыҥ спортсмена” ааты тустуу тренерэ Ю.В. Афанасьев Андриан Ленскийгэ туттарда. Оскуолабыт президенэ Огинск куоракка Россия Первенстотыгар чемпион, Дальнай Восток уонна республиканскай турнирдар призера Орто Халыматтан биһиги оскуолаҕа көҥүл тустуунан 5 кылаастан дьарыктанар.
Муома улууһуттан сылдьар Ефимов Давид Аан дойду Первенствотыгар (Польша, Дабки к.), Россия чемпионатыгар (Ижевск к.) , норуоттар икки ардыларынааҕы турнирдарын (Нидерландия, Хуговейн к.) призерыгар “Сыл бастыҥ спортсмена” ааты Саха Респубикатын үөрэҕириитин туйгуна, “Сыл бастыҥ иитээччитэ” анал аат хаһаайына А.Е. Марков туттарда. Давид Ефимов 5 кылаастан Н.Н. Кычкиҥҥа, А.И. Кычкинаҕа дьарыктанар. Сүүрүү отделениетын бастыҥ спортсмена Ким Катя буолла. Киниэхэ кубогы, грамотыны Саха Республикатын үтүөлээх тренерэ Г.Ф. Нохтунскай туттарда. Катя Ким Амурскай уобаластан 2015 сыллаахха 6 кылааска үөрэнэ кэлбитэ. Кини Дальнай Восток турнирыгар 60 м. дистанцияҕа, Хабаровскай куоракка 4х200 эстафетаҕа уонна республикаҕа чемпионка.
Волейболга быйыл Саха сирин спортсмен үөрэнээччилэрэ хаһан да буолбатах ситиһиилэрин ыллылар. Россия Первенствотыгар бронзовай призер буолан, Россия түһүлгэтигэр тохсунньу ыйга барар быраабы ыллылар. Бу хамаанда биир бастыҥ оонньооччута, биһиги оскуолабыт 11 А кылаас үөрэнээччитэ Лавров Иосиф волейбол отделениетын “Сыл бастыҥ спортсмена” ааты ылла. Иосиф Дальнай Восток “Надежда” Первенстоҕа үрүҥ көмүс призера уонна республика хас да төгүллээх чемпиона. Анал ааты Саха Республикатын физическай культураҕа уонна спорка үтүөлээх үлэһитэ, оскуолабыт директора Н.Н. Гуляев туттарда.
Ох саа отделениета оскуолабытыгар иккис тыынын ылан, 2015 сыллаахха аһыллыбыта. Ол кэмтэн ыла республикаҕа элбэх ситиһиини көрдөрдүлэр. “Сыл бастыҥ спортсмена” ааты 2017 сылга Чурапчы улууһуттан төрүттээх 11 А кылаас үөрэнээччитэ Макаров Борис буолла. Кини спорт маастарыгар кандидат, Саха Республикатын Первенствотын чемпиона, оҕолор икки ардыларыгар спартакиадаҕа чемпиона, республикатааҕы күрэхтэһиилэр хас да төгүллээх чемпиона. Тренер С.З. Майоров. Б. Макаровка наҕарааданы ГТО кыһыл көмүс значок хаһаайына, Саха Өрөспүүбүлүкэтин үөрэҕириитин туйгуна, педагогическай үлэ ветерана, иитээччи Раиса Андреевна Федорова туттарда.
Остуол тенниһэ отделение эмиэ оскуолабытыгар аһыллыбыта аҕыйах сыл буолла. Манна сөбүлээн барыта .... үөрэнээччи дьарыктанар. Бу отделение “Сыл бастыҥ спортсменын” ааты Ньурба улууһуттан сылдьар 9 А кылаас үөрэнээччитэ Степанов Айсен тутан, бастакы ураты ситиһиитинэн буолла. Андрей Саха Республикатын Первенствотын тус бэйэтэ уонна хамаанданан күрэхтэһии чемпиона, “ТОП 10 лучших игроков – “Надежда республики -2017” турнир чемпиона, Дальнай Восток Первенствотын пааранан уонна хамаанданан күрэххэ боруонса мэтээл хаһаайына (Уссирийск к.), Саха Республикатын үөрэнээччилэр спартакиадатын тус бэйэтэ уонна пааранан күрэх чемпиона. Тренер Н.М. Сабарайкин. Андрей Степановка наҕараадатын туттарда “Россия чулуу учуутала” Россия Президенин Гранын кыайыылааҕа, Саха Республикатын үөрэҕириитин туйгуна Акулина Николаевна Кузьмина.
Э.В. Аммосов иитиллээччитэ Анаабыр улууһуттан төрүттээх, 10 кылаас үөрэнээччитэ Егоров Вадимҥа акробатика отделениетын “Сыл бастыҥ спортсмена” ааты улуустааҕы “Учитель года” куонкурус кыайыылааҕа Татьяна Петровна Дмитриева туттарда. Вадим батукка ыстаныыга Дальнай Восток призера, чемпиона, Ярославль куоракка Россия чемпионатын кыттыылааҕа.
Биир долгутуулаах түгэнинэн үгэс буолбут “Сыл бастыҥ үөрэх туйгуна спортсмен” бириэмийэ туттарыыта буолла. Бу биһиги оскуолабыт 2010 сыллаах кыһыл көмүс мэтээллээх выпускницата, оскуолабыт Д.П. Коркин аатынан бириэмийэ лауреата, дуобакка Саха сирин бастакы Аан дойдутааҕы гроссмейстера Матрена Степановна Ноговицына сылын аайы туруорар ураты бириэмийэтэ. Кини сүҥкэн ситиһиитэ сылын аайы саха норуотун киэн туттуута буолар. Бу аҕыйах хонуктааҕыта Кытайга Аан дойдутааҕы интеллектуальнай Оонньуулар үс төгүллээх абсолютнай кыайыылааҕа буолан, үөрүү-көтүү үктэллээх саҥа көтөн кэлэр. Бириэмийэни Матрена Ноговицына ийэтэ Саха Республикатын үтүөлээх учуутала Мария Николаевна Ноговицына 8 Б кылаас үөрэнээччитэ Ньургуйаана Смирниковаҕа туттарда. Ньургуйаана уһуну ыстаныыга Норуоттар икки ардыларынааҕы VI “Азия оҕолоро” Оонньуулар призера, республика хас да төгүллээх чемпионката. Тренерэ ........
Спорка сыралаах үлэлэрин түмүгүнэн үөрэнээччилэргэ удостоврениелары оскуола директора Н.Н. Гуляев туттарда. Көҥүл тустууга РФ спорка маастар нуорматын толорбут 11 Б кылаас үөрэнээччитэ Аммосов Максимҥа, дуобакка спорт маастарыгар кандидат буолбут 7 А кылаас үөрэнээччитэ Константинов Ариаҥҥа. Бастакы разряд нуорматын толорбут спортсменнар: дуобакка Баишева Валерия (11 Б ), Куличкин Ньургун (5 А), көҥүл тустуууга Седалищев Дьулустаан (10Б), Явловскай Егор (9А), Ксенофонтов Афанасий (10Б) уонна Ленский Андриан (10Б ).
Оскуолабыт үөрэнээччилэрэ, учууталлара, тренердэрэ Саҥа Дьыла үтүө сонуннардаах, үгүс ситиһиилэрдээх, үрдүк үктэллэрдээх 2018 сылы көрүстэ.
Бырааһынньык бастакы үөрүүлээх чааһын кэннэ, дьэ, ырыа-тойук, үҥкүү-битии быыстала суох саҕаланна. Манна кылаастарынан представление көрдөрүү, фотозона, “Новая волна” оҕо уонна төрөппүт куонкурса, бастыҥ маскарад уонна да атын киһи сүргэтин көтөҕөр араас куонкурстар буоллулар. Сыл аҥарын түмүгүнэн “Саха-спарт” күрэххэ орто сүһүөххэ бырааттыы Морфуновтар аатын сүгэр 6 Б кылаас (сал. В.Н. Прокопьев, иитээччи Р.А. Федорова, улахан сүһүөххэ Гаврил Колесов аатын сүгэр 11 А кылаас (сал. А.К. Павлова, иитээччи П.С. Калачева) бастыҥтан бастыҥ кылаас буоллулар.
Оскуолабыт бырааһынньыгыттан “Төрөппүт хараҕынан” репортаж.
6б кылаас үөрэнээччитэ Филиппов Вова ийэтэ, Анжелика Алексеевна Филиппова, улуустааҕы киин балыыһа дерматолог бырааһа.
«Уолум бу оскуолаҕа 5 кылаастан үөрэнэр. Спорка, үөрэххэ интэриэһэ олус үрдээбит уонна “эппиэтинэс” диэн өйдөбүл оҕобор күүскэ киирбитэ киһини эрэ үөрдэр. Быйылгы Саҥа Дьыл ураты буолла. Уратыта диэн саҥа дьыллааҕы хаһыат оннугар фотозона уонна слайд киирэн биэрдэ. Бары төрөппүттэр кыһаллан, сүүрдүбүт-көттүбүт. Бэйэбит кылааспыт фотозонатын темата спортивнай оскуолаҕа үөрэнэрбитинэн сиэттэрэн, эһиил Аммаҕа буолар спартакиаданы көрдөрө сатаабыппыт. Кэлэр сыл ыт сыла буоларынан маскарадка биһиги кылаас “Рок-дог” мультик персонажтарынан представление көрдөрдүбүт. Онно иккис миэстэ буоллубут. Үөрүүбүт үгүс. Оҕом сотору-сотору эрийэн хас чааска кэлэҕин, хаһан кэлэҕин, тугунан кэлэҕин диэн тохтоло суох эрийэн, бэйэм да долгуйуум улахан этэ, этэргэ дылы, сүгүн да үлэлэппэтэ. (күлэр) Уопсай түмүккэ биһиги кылаас “Сахаспарт” кылаастар икки ардыларынааҕы күрэххэ бастакы миэстэ буоллубут. Оҕолорбут ситиһиилэриттэн биһиги төрөппүттэр үөрэбит, дьоллонобут. Түгэнинэн туһанан, махтал тылларбытын этиэхпитин баҕарабыт баспытааталбытыгар Раиса Андреевнаҕа. Кини биһиги оҕолорбутугар ийэлии истиҥ сыһыаннаах. Киниэхэ махталбыт муҥура суох.”
Седалищев Коля ийэтэ Анна Владиславна, “Чуораанчык” уһуйаан психолога. Сыл бастакы аҥарыгар оҕом улахан ситиһиитэ үөрэҕэр туйгун буолла, дуобакка диско-блиц турнирга, “Олимпионик” күрэххэ бастаабыта. Быйылгы Саҥа Дьылга саамай сэргии көрбүтүм – фотозоналар. Ордук, биллэн туран, объективно даҕаны, субъективно даҕаны иккис кылаас фотозоната ордордум. Иккис миэстэ буолбуппут. Оскуола үлэһиттэригэр, бу үлүгэр улахан оскуоланы тутан олорор коллективка, истиҥ эҕэрдэбин тиэрдэбин. Үөрэнээччилэргэ ситиһиилэри, талааннара өссө арыллан истиннэр диэн баҕа санаабын этэбин. Холобура, бу бүгүҥҥү Саҥа Дьыллааҕы представлениеҕа ордук “Шрек” мультигы туруорбут кылаас наһаа кыһаллан туруорбуттар.
Сылын аайы оскуолабыт Саҥа Дьылыгар төрөппүт уонна оҕо кыттыылаах куонкурус буолар. Быйылгы Саҥа Дьылга “Новая волна” - саҥа сүүрээн. Ол курдук бу куонкуруска ырыа эрэ буолбакка, оҕо төрөппүтүн кытта үҥкүүлүөн да сөп. Хас биирдии кылаастан кыттааччылар ох курдук оҥостон кэлбиттэрэ, бырааһынньыкпытын өссө ситэрэн-хоторон биэрдэ.
“Новая волна” куонкурус сүрүн спонсордарын кытта көрсөн кэпсэттибит. Анна Макаровна, Иван Власович – урбаанньыктар., уоллара Афанасьев Илларион 5 А кылааска үөрэнэр. Иван Власович: куораттан оҕобут бырааһынньыгар бүгүн кэллибит. Илларион бастаан Говорова-Будищева чааһынай авторскай оскуолаҕа, онтон саха политехническай лицейга үөрэммитэ уонна быйыл бу оскуолаҕа дуобакка дьарыктанар, куоракка боксанан дьарыктаммыта. Анна Макаровна: Оскуола базата олус үчүгэй. Иитээччилэр оҕолорго сыһыаннара олус истиҥ диэн бэлиэтии көрдүм. Уолум оскуоланы сөбүлээтэ, оҕо элбэҕиттэн, оҕолору кытта алтыһарыттан наһаа астынар. Манна нэдиэлэ аайы буолар куонкурстарга уолбут кыттар буолан, биллэрдик сайынна дии саныыбыт, оскуолаҕа личность өттүнэн сайдыыга улахан болҕомто уурулларын сэргээтибит. Оскуоланы кытта куруук сибээс тутабыт, ордук Анна Алексеевнаны кытта сылаас сыһыаннаахпыт. “Новая волна” куонкуруска биһиги дьиэ кэргэн бириис (пылесос) туруоран спонсордаатыбыт. Өссө да итинник көмөнү, спонсорствону оҥоро туруохпут. “Новая волна” куонкурус Гран при кыайыылааҕынан 11 А кылааска үөрэнэр Егор Оконешников аҕатынаан Реворий Николаевич буоллулар уонна Афанасьевтар дьиэ кэргэн ООО “Эко-профит” чааһынай тэрилтэттэн сүрүн бирииһи - пылесос “Самсунг” тутан үөрүүлэрэ улахан. Оконешниковтар “Майа сайына” ырыаны ыллаабыттара, ыал аҕата Реворий Николаевич идэтинэн суоппар. Егор бу оскуолаҕа 7 кылаастан үөрэнэр, чэпчэки атлетиканан дьарыктанар. Егор Норуоттар икки ардыларынааҕы VI “Азия оҕолоро” Оонньуулар кыттыылааҕа, республика хас да төгүллээх призера, 1000 м. дистанция чемпиона.
Саргылаах Саҥа Дьыл сырдык санаанан сыдьаайан, үгүс үтүө сонуннарынан илгийэн, сайаҕас санаана салайтаран тоҕус сиринэн томторҕолуу ойуулаах, тойон айаҕы тула туппут курдук тоҕойдуу түспүт томтордоох чэлгийэ сайдар Чурапчыга кэлэр кэрэнэн кэскиллэнэн тиийэн кэллэ.


« назад :: вперед »

 

Рейтинг образовательных сайтов mega-talant.com
ЦРТ «Мега-Талант»
Copyright © 2008 ГОУ «ЧРССОШИ им. Д.П. Коркина».
Частичная или полная перепечатка или иное использование материалов сайта допускается только с разрешения администратора сайта.
Ссылка на http://www.korkinsport.ru обязательна. Нарушители преследуются по закону.